A sección quinta da Audiencia Provincial de Pontevedra, con sede en Vigo, condenou a Pedro María M.O. como autor dun delito de estafa agravada, tras enganar varias persoas con falsos alugueiros de inmobles en Vigo e Sanxenxo. O procesado, condenado xa anteriormente e con numerosas causas abertas polo mesmo delito, utilizaba plataformas como Milanuncios ou Fotocasa para ofertar vivendas ou pisos turísticos sobre os que non tiña capacidade.
As vítimas adiantaban pagamentos como fianzas ou reservas, pero nunca podían acceder aos pisos nin recuperaban o diñeiro. Neste procedemento concreto, Pedro María M.O., que está a cumprir condena en prisión, foi xulgado por estafar catro persoas con falsos alugueiros de inmobles no centro de Vigo e dunha casa vacacional en Sanxenxo. A Audiencia condenouno a 18 meses de prisión e ao pagamento dunha multa de 1.260 euros. Ademais, deberá indemnizar os prexudicados cun total de 2.400 euros.
O tribunal destaca que as declaracións das vítimas, corroboradas por documentación das transaccións, evidencian que o sospeitoso actuou con ánimo de lucro, causando un prexuízo patrimonial significativo. Desta forma, cualifica os feitos como un delito continuado de estafa agravada, considerando que o engano recaeu, salvo nun dos casos, que era para uso turístico en Sanxenxo, sobre vivendas destinadas a residencia habitual, o que agrava a responsabilidade penal.
