O Tribunal de Instancia de Vigo, a través da sección do Contencioso-Administrativo, praza 2, desestimou o recurso presentado pola Federación Veciñal (FAVEC) contra a decisión do Concello de desaloxala do edificio no que tiña a súa sede, situado na Praza da Princesa, e avalou a actuación municipal ao considerar acreditado o “interese público”.
Na sentenza, o xuíz lembra que a presenza da FAVEC nas oficinas da segunda planta do número 7 desa praza se baseaba nun convenio asinado entre a entidade e o Concello de Vigo. Ese acordo establecía a cesión do dereito de uso das instalacións durante un período de 25 anos, ata 2030, aínda que tamén recollía expresamente a posibilidade de revogar esa cesión por causa de interese público municipal.
Neste caso, o Concello xustificou a súa decisión na necesidade de destinar ese espazo á Oficina Municipal de Rehabilitación de Vivenda, que viu incrementada a súa carga de traballo e tamén os seus ámbitos de actuación nos últimos anos. O xuíz considera xustificado ese interese público, polo que valida a decisión da Xunta de Goberno Local de extinguir a cesión do dereito de uso que permitía á FAVEC ocupar esas dependencias.
