A Sala do Civil e Penal do Tribunal Superior de Xustiza de Galicia (TSXG) confirmou integramente a condena imposta pola Audiencia Provincial de Pontevedra a José Luís M.C., declarado culpable por un tribunal de xurado do coñecido como crime de Coia. Nunha sentenza datada o 18 de marzo de 2026, o alto tribunal galego ratifica a pena de 12 anos e seis meses de prisión por un delito de asasinato e a de 1 ano de cárcere por un delito de tenencia ilícita de armas, o que suma unha condena total de 13 anos e medio de prisión.

Os maxistrados avalan a individualización da pena realizada pola Audiencia no delito de asasinato e consideran que foi correctamente fixada ao terse en conta a concorrencia de tres atenuantes: alteración psíquica, medo e confesión. Segundo recolle a resolución, a pena imposta sitúase “próxima á metade inferior” da que corresponde tras a rebaixa dun grao. No relativo ao delito de tenencia ilícita de armas, o TSXG tamén confirma a condena de 1 ano de prisión, ao entender que non concorre ningunha circunstancia atenuante neste caso.

Segundo os feitos declarados probados polo xurado, o crime produciuse na noite do 6 de abril de 2024, cando a vítima, Francisco Javier B.D., que coñecía ao acusado desde había anos, se presentou no seu domicilio armado cun machete e unha barra metálica. A sentenza recolle que José Luís M.C. abriu a porta da vivenda portando unha escopeta e realizou dous disparos, un deles a menos dun metro de distancia. Ese tiro impactou na fazula e na rexión cervical esquerda da vítima e acabou causándolle a morte.

Tal e como concluíu o xurado popular, o acusado actuou aceptando que podía acabar coa vida da vítima e nun contexto no que esta non tivo oportunidade real de defenderse, elemento clave para soster a cualificación de asasinato. A resolución tamén subliña que os disparos foron efectuados cunha escopeta que o procesado tiña no seu domicilio sen licenza e co número de serie borrado, polo que se trataba dunha arma prohibida.

No momento dos feitos, segundo quedou acreditado na causa, o condenado tiña as súas capacidades levemente afectadas polo consumo de cannabis e cocaína e por estar diagnosticado dun trastorno de saúde mental. Ademais, a Audiencia xa apreciara que actuou “por pánico ou terror” ante a presenza da vítima armada cun coitelo e unha barra de aceiro, unha circunstancia que limitou tamén de maneira leve a súa capacidade de actuar doutra forma.

Outro dos elementos valorados foi a confesión do acusado. A sentenza lembra que, unha vez detido pola Policía como presunto autor dos feitos, José Luís M.C. recoñeceu a autoría, contribuíndo de maneira eficaz ao avance da investigación. Coa decisión do TSXG, queda así ratificada na súa totalidade a condena imposta en primeira instancia por un dos sucesos máis coñecidos e impactantes ocorridos en Vigo nos últimos anos, o chamado crime de Coia.