Investigadores da Universidade de Vigo (UVigo) activaron recentemente unha nova rede experimental de comunicacións móbiles avanzadas que permitirá desenvolver e validar tecnoloxías 5G avanzadas e 6G en contornas reais, converténdose nun “campo de probas” de “referencia internacional” no que se poderán implementar “cantidades enormes de alternativas”.

Nun acto celebrado esta mañá en Vigo, Felipe Gil Castiñeira, investigador do Centro de Investigación en Tecnoloxías de Telecomunicación (atlanTTic) e responsable do proxecto, destacou que esta iniciativa transforma o campus nun laboratorio “aberto e flexible”, preparado para afrontar os desafíos da conectividade do futuro e apoiar proxectos científico-tecnolóxicos de alto impacto.

Tal como recolle o Diario da Universidade (DUVI), a rede estrutúrase arredor de dous proxectos financiados polo Ministerio de Transformación Dixital a través do programa UNICO I+D 6G: DEAN6, un espazo definido por software, dinámico e actualizable, e mmDEN6, que amplía as capacidades cara ás frecuencias de ondas milimétricas para o estudo de redes ultradensas 6G, cun investimento total de case 4 millóns de euros. Ademais, a infraestrutura complétase con máis de 3 millóns de euros destinados á adquisición de equipamento punteiro de xeración e medida.

“É unha rede única experimental a nivel europeo”, subliñou Gil Castiñeira, quen destacou a elevada cantidade de compoñentes, estacións base de radio, equipos de cómputo e sistemas de comunicación ópticos que permitirán probar solucións que noutros espazos non son posibles. O obxectivo é que funcione como “un laboratorio vivo” capaz de avanzar nas tecnoloxías cara ás redes de sexta xeración, convertendo o campus nun banco de probas singular para validar estándares antes da súa adopción comercial.