O Tribunal Supremo rexeitou o recurso de Audasa, concesionaria da autoestrada AP-9, contra o fallo que a obriga a devolver parte das peaxes cobradas de xeito indebido durante as obras na Ponte de Rande. Na súa providencia, o alto tribunal considera que a empresa non xustificou a vulneración do dereito á tutela xudicial efectiva que alegaba. Os maxistrados foron tallantes ao sinalar que a invocación dun dereito constitucional non pode servir para tentar reabrir unha controversia xurídica que xa foi resolta anteriormente.

Tras coñecerse a decisión, a asociación En-Colectivo celebrou que o Supremo desmonte o que cualificaron como unha “manobra” de Audasa para dilatar o proceso. O presidente da asociación, Diego Maraña, destacou que este pronunciamento reforza a solidez xurídica da sentenza e consolida o dereito de miles de usuarios afectados a recuperar o importe das peaxes xunto cos intereses correspondentes. Segundo En-Colectivo, o Supremo deixa claro que o procedemento desenvolveuse con todas as garantías e sen ningunha lesión de dereitos fundamentais.

Aínda que a concesionaria aínda podería tentar un recurso de amparo ante o Tribunal Constitucional, a asociación considera que a contundencia do Supremo fai moi difícil que esa vía poida prosperar ao carecer de contido constitucional real. Para En-Colectivo, este rexeitamento supón un paso decisivo e envía unha mensaxe clara de que os dereitos dos cidadáns deben ser respectados fronte ás grandes empresas.

Finalmente, dende a plataforma de afectados instaron a Audasa a abandonar definitivamente a vía da dilación e a proceder á devolución inmediata do diñeiro aos usuarios. Maraña lembrou que os afectados levan anos esperando por unha xustiza que agora parece definitiva, e confía en que non se poñan máis trabas administrativas para facer efectivo o pago tras este novo fracaso xudicial da concesionaria da AP-9.