A sección quinta da Audiencia Provincial de Pontevedra, con sede en Vigo, acollerá este martes un xuízo contra tres acusados de dous delitos de lesións, por propinar unha malleira a dous mozos nunha zona de lecer da cidade, causándolles lesións e secuelas. Os feitos ocorreron, segundo o escrito de acusación da Fiscalía, na madrugada do 9 de febreiro de 2024, cando os tres acusados, en conivencia con outras seis persoas que non puideron ser identificadas, atacaron a un mozo, cuxa parella fora compañeira sentimental dun dos acusados.

Así, propináronlle empuxóns e tirárono ao chan, onde a emprendérona con el a puñadas e dentadas na cara, os brazos e as pernas. Ademais, un dos procesados, practicante de boxeo (deporte para o que está federado) deulle unha puñada final que o deixou inconsciente. Ese mesmo acusado agrediu tamén a outro mozo, acompañante do anterior, propinándolle unha puñada na cara que lle rompeu a mandíbula e causoulle danos na dentadura.

Por estes feitos, o ministerio público pide que os tres sexan condenados a dous anos e medio de cárcere. A maiores, pide que se impoñan outros tres anos de prisión ao acusado, practicante de boxeo, que deu as puñadas na cara ás vítimas. Para todos os acusados e os dous delitos concorre, sostén a Fiscalía, a circunstancia agravante de abuso de superioridade. Os tres procesados deberán indemnizar ao mozo ao que apalizaron no chan con 7.625,09; e o ‘boxeador’ deberá compensar, a maiores, ao acompañante da vítima, con 12.132,67 euros polas lesións causadas.