A xuíza do Tribunal de Instancia do Porriño, praza 1, decretou o ingreso en prisión provisional, comunicada e sen fianza, do investigado pola morte dunha auxiliar de axuda a domicilio. Segundo informaron fontes do Tribunal Superior de Xustiza de Galicia (TSXG), esta medida terá que executarse, tal e como acordou a xuíza, nun módulo terapéutico ou institución análoga.

O home, que foi internado desde entón nunha unidade psiquiátrica de Vigo e acudiu este venres ao xulgado, está investigado por un delito de asasinato, sen prexuízo do que depare a causa. Os feitos sucederon a finais de xullo nunha das casas do Porriño ás que a traballadora acudía con regularidade situada na parroquia de Atios. A traballadora xa denunciaría unha situación de acoso ocorrida na vivenda onde foi asasinada.