O BNG de Vigo demandou a “inmediata paralización” da torre de control dixital de Peinador por “comprometer a seguridade aérea” tras detectarse “fallos técnicos” durante as probas. Nun comunicado, o Bloque apuntou que os problemas rexistrados, como a interrupción tras só 30 minutos de funcionamento nas probas, “confirman os riscos dunha tecnoloxía que limita a visibilidade do campo de voo, ao non ser de 360 graos e dificultade a xestión de voos, pondo en perigo a seguridade”.

“Peinador non é un lugar apropiado para experimentos tecnolóxicos”, criticou o portavoz nacionalista, Xabier Pérez Igrexas, apuntando cara ao “complexo tráfico aéreo” da cidade, con voos comerciais, helicópteros medicalizados, operacións de extinción de incendios e servizos de emerxencia, xunto con “condicións meteorolóxicas adversas frecuentemente”. “As cámaras da torre remota, que son transmitidas a un soto sen visión directa da pista, non garanten a precisión necesaria, especialmente en horas punta ou con baixa visibilidade. Isto pode provocar atrasos e riscos graves para a seguridade”, insistiu Igrexas.

El lamentou que as intencións de Aena que, ao seu xuízo, “busca reducir custos laborais e precarizar o traballo dos controladores”, xa que se podería “centralizar desde Vigo o control aéreo do aeroporto de Alvedro”. “Non imos permitir que Peinador se converta nun laboratorio de probas para un modelo que prioriza o lucro de Aena e empresas como Saerco por enriba da seguridade e do servizo público”, sentenciou Igrexas.