O PP de Vigo anunciou a presentación dunha declaración institucional para que o pleno da corporación municipal esixa ao Goberno central que manteña os oito xulgados de instrución da cidade, despois de que o Ministerio indicase que transformaría un deles nun xulgado de violencia contra a muller.

Nun comunicado, os ‘populares’ defenderon que a creación deste segundo xulgado de violencia sobre a muller non debería levar a eliminación dun xulgado de instrución xa existente. A iniciativa que propón o PP busca reclamar ao Executivo que “reconsidere” o “evidente agravio” que supón suprimir a oitava sala de instrución de Vigo para crear, no seu lugar, un segundo xulgado de violencia sobre a muller.

Respecto diso, a presidenta do Partido Popular de Vigo, Luisa Sánchez, mostrou a súa “satisfacción” pola incorporación deste novo órgano especializado, o cal é unha “boa noticia” para a cidade. Con todo, esa mellora acométese á conta de suprimir outra unidade xudicial, o cal é un “despropósito inasumible”. “Vai supor un aumento dos asuntos nas restantes salas de instrución cando a día de hoxe xa se atopan ao límite da súa capacidade, o que implicará atrasos na tramitación de dilixencias penais”, valorou Sánchez.

CABALLERO E BOLAÑOS

Pola súa banda, o alcalde, Abel Cabellero, expresou este venres a súa confianza en que o Ministerio de Xustiza manteña os oito xulgados de instrución operativos, sumándose o novo de violencia sobre a muller. Así o sinalou, segundo dixo, tras manter varias conversacións co propio ministro, Félix Bolaños. Caballero avanzou que traballará co Ministerio para buscar a fórmula de manter os oito xulgados de instrución e se incremente o número de xulgados de violencia sobre a muller.