SOS Sanidade Pública denunciou a “opacidade” do convenio asinado pola Consellería con Ribera Povisa para a atención de preto de 120.000 persoas da área sanitaria de Vigo, solicitando un plan de investimentos co obxectivo de incrementar os recursos públicos. Precisamente esta mañá a plataforma levou a cabo unha concentración ante as portas do hospital privado, afeando ao conselleiro de Sanidade, Antonio Gómez Caamaño, que non informase as condicións do acordo antes de asinalo, unha vez finalizada a negociación.

A asociación lamentou que dita negociación produciuse nunha situación de “desigualdade” xa que, ao seu xuízo, a Consellería de Sanidade “non dispón de recursos sanitarios públicos, nin materiais nin humanos, para atender ao 100 % da cidadanía”. “Ao non existir unha alternativa asistencial pública, a negociación deste acordo está condicionada polo grupo privado, cuxo obxectivo é incrementar os beneficios económicos dos seus accionistas“, engadiron durante o acto, no que estiveron acompañados polo portavoz do BNG de Vigo, Xabier Pérez Igrexas.

A plataforma esixiu ao Servizo Galego de Saúde (Sergas) que se dean a coñecer os termos do contrato asinado con Povisa. Ademais, reclamou un plan de investimentos que permita recuperar os recursos asistenciais públicos previstos inicialmente no deseño e planificación da área Sanitaria no momento da construción do hospital Álvaro Cunqueiro. Respecto diso, solicitan unha ampliación deste hospital, ademais da reordenación asistencial da área, reivindicado un Centro de Alta Resolución coas especialidades máis demandadas en Vigo e outro no Morrazo, entre outras peticións.