A sección quinta da Audiencia Provincial de Pontevedra, con sede en Vigo, xulgará o vindeiro mércores, día 14 de maio, a un home acusado de agredir sexualmente a un menor de 16 anos. Os feitos ocorrerían entre finais de 2022 e xaneiro de 2023 en lugares comúns que ambos frecuentaban e para el Fiscalía solicita 12 anos e medio de prisión por un delito de agresión sexual a menor de 16 anos empregando abuso de superioridade, concorrendo a circunstancia modificativa da responsabilidade criminal de reparación do dano.
Ademais, o Ministerio público solicita para o acusado a pena de liberdade vixiada por tempo de 5 anos e a inhabilitación especial para calquera profesión, oficio ou actividade, sexan ou non retribuída, que leve contacto directo e regular con menores de idade por un tempo de 5 anos superior ao da duración da pena de privación de liberdade imposta en sentenza. Tamén pide a prohibición de aproximarse á vítima ou comunicarse con ela nun radio de 500 metros. Pola súa banda, os proxenitores do menor renunciaron á acción civil ao chegar co acusado a un acordo indemnizatorio por importe de 40.000 euros. Previsiblemente, o xuízo levarase a cabo a porta pechada.
