O Servizo Galego de Saúde (Sergas) e o Hospital Ribera Povisa de Vigo finalmente asinaron electronicamente o novo contrato de servizos, por importe de 195 millóns de euros e un período de vixencia de dous anos, para a prestación da asistencia sanitaria especializada na área de Vigo.

Segundo informou o departamento sanitario da Xunta, o obxectivo é prestar asistencia a unha poboación estimada de preto de 116.000 persoas que libremente así o elixe, asignadas aos centros de saúde dos municipios de Cangas, Moaña, Baiona, Nigrán, Gondomar e aqueloutros que se determinen do municipio de Vigo.

Entre as novidades que incorpora o novo contrato atópase que o Goberno galego realizará os abonos a Povisa en función dos procesos realmente realizados e non per cápita como ata agora, dando cumprimento ás recomendacións do Consello de Contas.

Ademais, contarase cunha unidade de supervisión e control para o seguimento do contrato, “que permitirá á Xunta garantir o perfecto funcionamento do servizo e velar pola calidade asistencial”.

“Na nova carteira de servizos reservaranse as prestacións hospitalarias de maior complexidade para o hospital público Álvaro Cunqueiro, grazas á súa vangarda diagnóstica e tecnolóxica”, reivindicou o Executivo autonómico.

Ademais, Povisa estará obrigada á realización de investimentos en obras para a mellora das instalacións e a adquisición dos equipamentos que resulten necesarios para o correcto desenvolvemento da actividade, destinando a este fin un mínimo dun 3% do importe anual do contrato para asegurar a calidade e a adecuación dos recursos materiais, medios e instalación empregados na prestación dos servizos.

“Así mesmo, Povisa asume a obrigación de aplicar os incrementos retributivos pactados no convenio colectivo. Concretamente, en 2025 debe aplicar unha subida dun 3% para os profesionais da entidade”, sentenciou o Sergas.

O conselleiro de Sanidade, Antonio Gómez Caamaño, defendeu o novo contrato con Povisa anunciado este xoves por un importe de 195 millóns de euros e un período de vixencia de dous anos para a prestación da asistencia sanitaria especializada na área de Vigo e insistiu en que “non é privatizar”.

A preguntas dos medios este venres tras reunirse coa Valedora do Pobo, o titular de Sanidade explicou que o incremento se debe ao proceso “de acordo que se chegou con Povisa” e subliñou que “antes era unha especie de concerto per cápita e agora vaise a pagar por proceso”.

“O Sergas vai pagar exclusivamente polo que se faga alí, cunhas tarifas axustadas, tamén co compromiso de ter un control estrito sobre toda a actividade asistencial, un compromiso tanto en Recursos Humanos como tecnolóxicos e que o hospital estea ben dotado. Iso non é privatizar; estamos ‘Sergastizando’ o que é Povisa”, resolveu.