A Fiscalía de Vigo pide 30 anos de cárcere para a parella acusada de queimar dous autobuses de Vitrasa, a concesionaria de transporte municipal en Vigo en 2023.

Segundo recolle o escrito do Ministerio Fiscal, para a traballadora da compañía, que conducía un dos vehículos, solicitan 10 anos prisión por cooperación necesaria nun dos incendios.

Ao outro acusado, o seu compañeiro sentimental, pídenselle 20 anos de cárcere por participar como autor material nos dous sucesos.

A Fiscalía atribúelles dous delitos de incendio con perigo para a vida, posto que no interior dos autobuses viaxaban unhas 10 persoas, algunhas de avanzada idade, “coas limitacións que iso leva”.

FEITOS RELATADOS

Os feitos remóntanse a abril de 2023, cando o acusado, que viaxaba ao redor das 21.52 horas nun dos autobuses, utilizou un artefacto incendiario caseiro, consistente nunha bolsa con material combustible impregnado de gasolina como elemento acelerador da combustión, que colocou baixo un asento da penúltima fila.

Cando prendeu, gritou ‘lume’, o que provocou que o condutor frease rapidamente e abrise as portas para que baixasen os viaxeiros, incluído o acusado. Neste caso, o lume non chegou a estenderse demasiado pola intervención do propio condutor. Os danos orixinados no autobús ascenderon a 4.673,34 euros.

Apuntan que escasos minutos despois, este home subiu a outro autobús, conducido pola outra procesada e levou a cabo a mesma acción. Neste caso, con todo, o vehículo calcinouse por completo. O valor do autobús ascendía a 423.183,22 euros.

En canto á responsabilidade civil, a Fiscalía pide unha indemnización de 46.856,56 euros para Viguesa de Transportes S.L.