Dous construtores, que serán xulgados na sección quinta da Audiencia Provincial de Pontevedra (con sede en Vigo) este martes, enfróntanse a 3 anos de prisión, por apropiarse do diñeiro dun cliente, en cuxa vivenda acordaran facer unha obra, sen levar a cabo os traballos comprometidos. Segundo recolle o escrito de acusación da Fiscalía, os feitos ocorreron en maio de 2021, cando o prexudicado contratou unha obra na súa vivenda da parroquia viguesa de Candeán, coa empresa dun dos acusados. Os traballos foron orzados en 13.000 euros e o cliente fixo unha transferencia de 5.000 á empresa construtora.
O acusado non iniciou os traballos, alegando problemas de permisos municipais e falta de empregados. En abril de 2022, o prexudicado reclamou a devolución do diñeiro e o acusado díxolle que o gastou e que estaba pendente de cobrar outros traballos para iniciar a obra. En xullo, entra en escena o segundo acusado, administrador doutra empresa, que se ofreceu a realizar a obra, e pediulle ao cliente outra transferencia, por 7.200 euros, tras un cambio nos materiais e o orzamento. A vítima realizou a nova transferencia e, unha vez que este segundo acusado recibiu o diñeiro, transferiuno a outra empresa para a compra de materiais (panel de tella e placas tipo ‘sandwich’).
Ademais, entregoulle ao outro acusado unha cantidade indeterminada de diñeiro para facer o traballo. Ningún dos acusados chegou a executar a obra contratada e tampouco devolveron o diñeiro ao cliente, ao que lle deixaron debidos 8.900 euros (unha vez descontados os 3.300 euros dos materiais, que si entregaron). Por estes feitos, o ministerio público acúsaos dun delito de apropiación indebida, e pide para cada un dos construtores 3 anos de prisión e multa de 3.240 euros. Tamén reclama que os procesados, e a empresa do primeiro deles, indemnicen ao prexudicado nun total de 17.800 euros.
