Axentes da Policía Local de Vigo detiveron a un veciño da cidade, J.M.C.C., natural de Xirona e de 28 anos de idade, como presunto autor dun delito de violencia de xénero, tras ameazar á súa parella cando ela decidiu pór fin á relación. Os feitos ocorreron este xoves, cando a Policía Local recibiu unha chamada á primeira hora da mañá, dunha muller que denunciaba un episodio de ameazas por parte da súa exparella, no seu domicilio da zona de Moledo.

Ao chegar ao lugar, os axentes entrevistáronse coa muller, que relatou que o día anterior a súa parella losqueáraa, polo que decidiu pór fin á relación. Este xoves, o home presentouse no domicilio e, ao descubrir que ela lle deixou unha maleta coas súas pertenzas na leira exterior da casa, reaccionou de forma violenta e ameazouna, esparcindo a roupa pola leira.

O individuo abandonou o lugar e a procura dos axentes foi infrutuosa. Non entanto, horas despois, o propio sospeitoso chamou á Policía desde unha vivenda na parroquia de Beade e explicou que sabía que o estaban buscando, polo que solicitou poder recoller as súas cousas. A Policía desprazouse ata esa vivenda e procedeu á súa detención como presunto autor dun delito de violencia de xénero.