A sección quinta da Audiencia Provincial de Pontevedra, con sede en Vigo, condenou a 3 meses de prisión ao futbolista Ángel C.F., acusado dun delito de lesións, despois de que este recoñecese que, en outubro de 2022, tras disputarse un partido de fúbtol, propinou un cabezazo a un rival e fracturoulle os ósos do nariz. Así, Fiscalía, acusación particular e defensa chegaron a un acordo de conformidade e o acusado recoñeceu os feitos, e aceptou esa pena de 3 meses de prisión, ademais do pago de 5.000 euros en concepto de indemnización ao prexudicado e de costas procesuais.

O tribunal acordou a suspensión da execución da pena durante un período de 2 anos, a cambio de que o procesado non delinca nese tempo, e de que pague a responsabilidade civil acordada. De feito, xa foron abonados 1.000 euros, e outros 1.000 euros pagaraos antes do próximo 15 de decembro; mentres que os 3.000 euros restantes serán abonados en prazos mensuais de 200 euros. Os feitos ocorreron na tarde do 23 de outubro de 2022, tras a disputa dun partido entre o equipo do acusado, o C.D.Vincios, e o Moledo C.F, no campo da Pasaxe, en Gondomar. Cando os xogadores se dirixían por unhas escaleiras aos vestiarios, o acusado propinou un cabezazo a un xogador rival, provocándolle a fractura dos ósos do nariz.