Delegados da CIG concentráronse este xoves ante o Concello de Vigo como protesta polas trabas do goberno municipal á instalación dun monumento conmemorativo, sufragado polo sindicato, das loitas obreiras de 1972, e denunciaron mediante unha pancarta que “Abel Caballero quere borrar as loitas obreiras de Vigo”. A protesta, na que participou tamén o secretario xeral da CIG, Paulo Carril, pretende pór de manifesto que o goberno de Vigo “pon un reparo detrás doutro, unha escusa encima doutra” e bloquea a instalación deste monumento, respondendo as peticións da CIG con “burocracia” e “silencio”.

O responsable comarcal do sindicato, Alberto Gonçalves, advertiu de que a organización “non vai permitir que ningún goberno local ofenda desta maneira a memoria das grandes loitas obreiras que se viviron en Vigo”. “Quizá Abel Caballero non comprendeu a gran lección que deron as folgas de 1972, pero ímoslla a refrescar: a forza organizada da clase traballadora é imparable”, advertiu. Segundo lembrou Gonçalves, a CIG despregou un amplo programa de actividades en 2022, con motivo do 50 aniversario deses episodios, que “abriron unha nova páxina na historia do movemento obreiro galego”. Nese marco, o sindicato contactou co Concello para ofrecer á cidade a doazón dun monumento de pedra, “encargado e pago polo sindicato”.

Con todo, lamentou, “ese alcalde, ao que tanto lle gustan as inauguracións e grandes obras, o único que fixo desde xaneiro de 2022 foi marear a perdiz”. Así, explicaron que a CIG se mostrou disposta a colaborar e aceptou ata tres posibles localizacións na cidade, pero a instalación nunca acabou de concretarse, no que se evidenciou como “unha clara demostración da política antiobrera e profundamente antisindical do alcalde”. Finalmente, confirmou que a CIG rexistrou unha proposta de moción para que sexa debatida no Pleno, e solicitou formalmente poder intervir na sesión.