Alumnos do CEIP Altamar de Vigo acudiron este xoves con casco en protesta pola situación na que se atopa o centro educativo, denunciando “carencias” que fan do colexio un “lugar insalubre”. Así, decenas de nenos amontoáronse ás portas das instalacións con cascos amarelos para pór de manifesto as condicións nas que se atopa o Altamar, con “ratas, cascudas, humidades e falta de mantemento”, segundo denuncia a asociación de nais e pais.

Precisamente a presidenta da ANPA, Rebeca Díez, lamentou que tanto pais, como profesores e alumnos levan un ano protestando ao Concello e á Xunta para que arranxen o centro. Ao seu xuízo, é competencia de ambas as administracións porque “hai problemas estruturais (Xunta) e tamén hai falta de mantemento (goberno local)”. “Todo empeorou. Temos humidades, infección de cascudas, ratos, ramplas de acceso ao colexio inutilizadas, escaleiras oxidadas, desprendemento nas fachadas, incluso o teito de dirección está a piques de caer pola humidade“, indicou en declaracións a Europa Press.

Ademais, afeou ao Concello que neste curso o colexio quedouse sen conserxe, despois da xubilación da persoa que ata agora ocupaba o cargo. “É a directora quen abre o colexio e péchao, abre as xanelas de todas as aulas. Ademais, o resto de profesores fan labores que debería facer o conserxe. E iso é responsabilidade do Concello”, engadiu. Así, lamentou que as administracións traten de “botarlle a culpa” a unha á outra e non dean solución o problema, que afecta a preto de 200 nenos de entre 3 e 12 anos de idade.