O grupo municipal do BNG pediu ao goberno de Vigo un plan de actuación ante o incremento dos atropelos na cidade, e advertiu de que este tipo de sinistros multiplicáronse nos últimos anos, ata rexistrarse unha media dun atropelo cada tres días.
Así, o grupo nacionalista urxiu ao equipo de Abel Caballero a actuar ante a “crecente inseguridade viaria” e reclamou a posta en marcha dun Plan Urbano de Seguridade Viaria.
Segundo sinalou o portavoz do grupo, Xabier Pérez Igrexas, cada ano rexístranse máis de 2.000 accidentes na cidade e, no últimos cinco anos, o número de atropelos multiplicouse por cinco. Só o ano 2022 (último dato actualizado), foron 109 atropelos, o que supón unha media dun cada tres días.
Por iso, pediu máis medios e un plan de actuación específico para lograr o obxectivo de cero mortes e cero accidentes graves, seguindo o camiño doutras cidades como Pontevedra, e priorizando o tránsito a pé, o uso seguro de bicicletas e vehículos de mobilidade persoal, e reforzando o transporte colectivo para reducir o número de coches circulando pola cidade.
