A ocupación de terreo municipal por parte da autoestrada AP-9 ao seu paso por Vigo deixará este ano de estar practicamente exenta do pago do IBI e deberá abonar o cen por cento do imposto, o que supón o ingreso de 383.000 euros nas arcas municipais da cidade olívica.

Así o confirmou o alcalde, Abel Caballero, que sinalou que, “por primeira vez”, este 2024 a concesionaria pagará a totalidade do Imposto de Bens Inmobles, xa que desde a súa construción beneficiábase dunha bonificación do 95 %, ao amparo dun decreto que data da época franquista.

Deste xeito, Audasa pasará de abonar uns 18.000 euros a pagar 383.000 euros, explicou o rexedor, que engadiu que “era intolerable que unha empresa con tal nivel de beneficios non pagase IBI”. Deste xeito, Vigo pasará a ingresar en concepto de IBI por parte de autoestradas máis de 433.000 euros, sumando a taxa que paga a autoestrada autonómica AG-57 (Val Miñor).