O alcalde de Vigo, Abel Caballero, asegurou que a semana que vén abrirase o prazo para solicitar as bolsas de comedor no Concello de Vigo, despois das críticas vertidas pola Federación Olívica de Asociacións de Pais e Nais de centros escolares de Vigo (Foanpas) pola tardanza, un ano máis, destas axudas, que se cobrarán “en xaneiro ou febreiro”.
Nun audio difundido aos medios de comunicación, o rexedor dixo que as axudas están “garantidas ao 100% para todos os demandantes que cumpran os requisitos”, e que Vigo é a cidade española “coa política social máis importante de España”. Tras enviar este venres a convocatoria ao Boletín Oficial da Provincia de Pontevedra, a partir da próxima semana abrirase o prazo durante 20 días hábiles.
Para a súa tramitación, Caballero dixo que se reforzou o equipo do persoal administrativo do Concello coa incorporación de seis profesionais. Ademais, aproveitou para cargar novamente contra a Xunta de Galicia, asegurando que debería ser o Goberno autonómico quen pague estas bolsas.
Todo iso despois de que Foanpas criticase fai preto dun mes que o Concello non convocase aínda as bolsas para que os nenos da cidade gocen do servizo de comedor de forma gratuíta, o que fará que ese diñeiro sexa cobrado polas familias “en xaneiro ou febreiro”.
Segundo a asociación, o curso pasado foron convocadas a finais de xuño e as bolsas cobráronse en decembro, obrigando a pais e nais a adiantar o diñeiro do comedor durante catro meses. Algo que moitas familias non se poden permitir. Este ano, a convocatoria non estará dispoñible ata mediados de agosto, dous meses despois que en 2023.
