O grupo municipal do PP no Concello de Vigo esixiu este venres ao alcalde, Abel Caballero, que garanta a seguridade na cidade durante a noite de San Xoán, ante a previsión de que os efectivos de bombeiros estean, unha vez máis, por baixo do mínimo estipulado, e haxa que pechar o parque de Coruxo (como ocorreu nos últimos días). Nun comunicado remitido aos medios, o portavoz ‘popular’, Miguel Martín, lamentou que “a pouco máis de 48 horas para que se celebre a noite de San Xoán, a noite das fogueiras, Vigo non sabe se vai contar co mínimo de efectivos de bombeiros que esixe a propia normativa municipal”, que son 20.
Precisamente, lembrou, debido ao déficit de persoal, o parque de Coruxo estivo pechado varios días esta semana e a súa apertura durante a noite de San Xoán “pende dun fío”. Un novo peche, advertiu, “condicionará seriamente o tempo de reacción ante un eventual problema” que poida xurdir lonxe do parque municipal de Teis, coincidindo coa aglomeración de xente na contorna das fogueiras. Ademais, este ano algúns barrios estenderon as celebracións a toda a fin de semana, e reclamou que a cidade “conte co despregamento necesario” para garantir a seguridade en todo o termo municipal.
