InicioSociedadeO grupo municipal do PP denuncia que o festival Terraceo veuse celebrando...

O grupo municipal do PP denuncia que o festival Terraceo veuse celebrando baixo “unha autorización irregular”

O goberno local confirma que o permiso para usar a terraza outorgouse o 13 de xuño, un mes despois de iniciado o festival.

PUBLICADO O

- Advertisement -

O grupo municipal do PP no Concello de Vigo denunciou este luns que o festival Terraceo, que se celebra desde 2020 na terraza sobre a cuberta do Auditorio Mar de Vigo e estes días está na súa quinta edición, non dispón de licenza para o uso dese espazo, e non a tivo tampouco nas edicións anteriores. Nunha rolda de prensa, o portavoz do grupo, Miguel Martín, explicou que o Terraceo atopouse este ano cunha circunstancia que non se produciu ata agora (salvo mala previsións meteorolóxicas): os concertos están a celebrarse no interior do Auditorio, ao non dispor de licenza a promotora para usar a terraza.

Segundo explicou o concelleiro ‘popular’, o motivo polo que as actuacións non se puideron facer na terraza non é outro que a falta dese permiso. Así, sinalou que a promotora do festival, que é a mesma empresa que xestiona a programación cultural do Auditorio, solicitou a licenza o pasado 7 de marzo e foille denegada pola necesidade de achegar documentación e, explicou o edil, o seu grupo está á espera de que o goberno lle informe sobre como está a tramitación desa solicitude.

Pero o PP foi máis aló e advertiu de que esa licenza non foi outorgada nas edicións anteriores, senón que o Concello outorgou unha simple autorización en base a unha premisa errónea: a administración municipal daba por feito que podía autorizar o uso da terraza porque a promotora do festival é a concesionaria do Auditorio. Miguel Martín sinalou que a concesión á empresa non é sobre todo o Auditorio, senón só dalgúns espazos e, precisamente, a terraza non está incluída, como tampouco o está a cafetaría da sétima planta, á beira desa terraza.

Esta circunstacia xa existía cando se iniciou o festival, en 2020, e naquel momento, a Asociación de Produtores Técnicos de Espectáculos de Galicia (APTEGA) dirixiuse ao Concello para preguntar pola licenza e a titularidade dese espazo. O Concello respondeu alegando que a concesionaria era titular e que tiña as “autorizacións municipais oportunas”. Isto quere dicir, incidiu o portavoz do PP, que estes anos o Terraceo celebrouse cunha “autorización irregular” e a alarma saltou por mor dunha intervención da Policía Local o pasado mes de decembro, cando se estaba celebrando unha cea de empresa na cafetaría anexa á terraza, e descubriuse que a concesionaria non podía dispor dese espazo.

RESPOSTA DO GOBERNO LOCAL

Tras a denuncia feita polo PP en rolda de prensa, o portavoz do goberno municipal de Vigo, Carlos López Font, remitiu unhas declaracións aos medios nas que tacha a Miguel Martín de “completo ignorante” porque “non estuda o máis mínimo” as cuestións que expón, e acúsalle de “mentir reiteradamente”. Así, asegurou que o Terraceo ten autorización para usar a terraza do Auditorio Mar de Vigo “desde o pasado 13 de xuño”, é dicir, máis dun mes despois de que comezase a actual edición do festival, e unha vez que o “xestor privado” do evento achegou a documentación que lle foi requirida.

Con todo, nas súas declaracións, López Font non aclarou se o festival tiña a licenza para usar a terraza nas primeiras catro edicións. Na actual, a quinta, estaban programados ata o día de hoxe seis concertos, dos que 4 tivéronse que celebrar no interior do recinto, outro foi aprazado (Rebeliom do Inframundo) e outro cancelado (Los Secretos e Pancho Varona).

O concelleiro do PP, Miguel Martín, constatou que, “sen querelo”, o goberno vigués deulles a razón ao admitir, ao seu xuízo, que os concertos deste ano non se fixeron ata agora na terraza por falta de licenza. E tras criticar que non dese explicacións sobre anteriores edicións, lamentou que “o único argumento” que queda a Font é a “descualificación persoal”: “triste consolo para quen non sabe que dicir”.

ÚLTIMAS

O Museo do Mar de Galicia difunde o legado de Luísa Villalta cunha mostra do seu legado e traxectoria

O director xeral de Cultura, Anxo M. Lorenzo, inaugurou este luns no Museo do...

Alerta na praia de Samil por exercicios de rescate marítimo

Un exercicio de adestramento de rescate marítimo alertou na tarde deste luns aos bañistas...

Abren dilixencias previas por verteduras da cidade deportiva do Celta tras denuncias ecoloxistas

O Xulgado de Instrución número 2 de Vigo notificou a Ecoloxistas en Acción a apertura de dilixencias previas...

Atopan unha nova alga moi invasora na ría de Vigo

O grupo de investigación BioCost, do Centro Interdisciplinar de Química e Bioloxía da Universidade...