Un veciño de Baiona aceptou este mércores a pena de 12 meses de prisión, ao recoñecerse autor dun delito de malos tratos animais, por matar á súa cadela arroxándoa contra o chan e dándolle unha patada. Así se acordou nunha vista de conformidade celebrada no Xulgado do Penal 3 de Vigo, na que a sala ditou sentenza e declarouna firme. A execución da pena de prisión queda suspendida durante 3 anos, sempre que o procesado non delinca nese tempo; ademais, por ese mesmo período queda inhabilitado para exercer profesión ou actividade relacionada con animais, e prohíbeselle a tenencia dos mesmos.
Os feitos ocorreron na mañá do 9 de xullo de 2023, cando o acusado se atopaba coa súa cadela na vía pública, e o animal escapouse, entrando nun hotel. O dono dirixiuse a un empregado do establecemento para explicar que a cadela se escapou e este, tras recoller ao animal e porlle a correa, devolveullo ao seu propietario. Ao saír, o acusado levantou no aire ao animal, suxeito pola correa, e deixouno caer violentamente contra o chan ata en catro ocasións, a pesar de que, á terceira vez, a cadela xa non se movía. Ademais, cando o animal estaba tendido no chan, propinoulle unha patada.
Momentos despois presentouse coa súa mascota morta en brazos na recepción do hotel e comezou a gritar e a increpar ao empregado, acusándolle de matar á cadela, polo que o traballador do hotel chamou á Policía. En presenza dos axentes, o acusado volveu repetir que o empregado matara á súa cadela, aínda que logo cambiou a súa versión e afirmou que morrera atropelada por un coche que saíu do hotel.
Tras estes feitos, foise do lugar co animal e enterrouno nun xardín na súa casa. Non entanto, a Garda Civil (que confirmou no seu momento que o home ten antecedentes policiais) identificouno como presunto autor dun delito de malos tratos animais e pola denuncia falsa, e procedeu á exhumación do can, para o seu traslado ás instalacións do Centro de Acollida e Protección de Animais da Deputación (CAAN), onde se lle practicou unha necropsia. O estudo confirmou que a cadela sufrira diversas contusións e fracturas dos ósos frontal e parietal dereito, así como un hematoma subdural, que lle ocasionaron a morte.
