A delegada territorial da Xunta en Vigo e presidenta do Consorcio Casco Vello, Ana Ortiz, visitou este xoves os traballos de rehabilitación do edificio Elduayen 31 e Ferrería 10, que xa están na última fase da obra para poder saír a concurso nas próximas semanas seis vivendas. En concreto, tras un investimento de 1,4 millóns de euros (sumando a compra do inmoble e a adxudicación dos traballos), esta actuación suporá a posta a disposición dos cidadáns de seis novas vivendas de protección autonómica, de dous e tres dormitorios, e dun local comercial.

Tal como explicou o Goberno galego nun comunicado, os condicionantes urbanísticos do solar implicaron a necesidade de manter o patio interior e, en consecuencia, reformular o proxecto inicial. Deste xeito, aínda que funcionarán como unha comunidade única, unida pola planta baixa, manteranse dous edificios, un con fachada cara a Elduayen de cinco plantas e outro de tres en Ferrería.