A Deputación de Pontevedra abriu este mércores, e ata o 12 de xaneiro, a inscrición para participar na primeira das rutas ornitolóxicas que organiza este ano, que se enmarcan dentro do programa ‘Voando nas Rías Baixas’ impulsado pola institución provincial da man de SEO/BirdLife.

Nesta ocasión, levaranse a cabo o domingo día 14 de xaneiro na Foz de Ramallosa e en Praia América, ambos no concello de Nigrán. Nun comunicado, a Deputación explicou que este espazo natural de Ramallosa forma parte da Rede Natura 2000 e trátase dun lugar de alto valor ecolóxico, “moi cómodo para a observación de aves polo preto que se poden avistar e polo confiadas que se mostran cara o ser humano“.

As persoas interesadas en participar poderán anotarse no formulario publicado na páxina web da Deputación. Hai 25 prazas dispoñibles e cada participante pode anotarse con tres acompañantes máis. O percorrido, con dous guías, inclúe autobús e prismáticos para visualizar as aves.