O xulgado de instrución número 1 de Cangas ditou auto no que acorda a apertura de xuízo oral contra o home acusado de asasinar á súa veciña septuaxenaria, en xullo de 2021, na zona de Tirán, no municipio de Moaña. Segundo recollen o auto da xuíza e o escrito de conclusións provisionais da Fiscalía, os feitos ocorreron na mañá do 3 de xullo de 2021, cando o acusado se dirixiu á vivenda da vítima, de 72 anos de idade, “coa intención de apropiarse dos obxectos do interior da vivenda que fosen do seu interese”.
Para lograr o seu obxectivo, “de forma súbita” inmobilizou á muller atándolle as mans e, a continuación, “con intención” de acabar coa súa vida, “colocoulle unha corda ao pescozo, provocando a súa asfixia mecánica e, en consecuencia, o seu falecemento”. Xulgado e Fiscalía tamén expoñen que o acusado “tiña plena conciencia e vontade dos seus actos” e, aínda que presentaba unha dependencia moderada a sustancias estupefacientes, non tiña “afectada a súa capacidade para a toma de decisións”.
Por todo iso, acordouse a apertura de xuízo oral polo delito de asasinato e por un delito tentado de roubo con violencia en casa habitada (non consta que o home lograse levar nada), e desígnase como órgano competente para axuizar os feitos o tribunal de xurado da Audiencia Provincial de Pontevedra.
SOLICITUDE DE CONDENA FISCALÍA
A Fiscalía cualifica os feitos como un delito de asasinato e un de tentativa de roubo con violencia, en relación de concurso medial, posto que “o asasinato foi o medio para cometer o roubo”. Así, o ministerio público solicita que o acusado sexa condenado a 25 anos de prisión, e que se lle prohiba comunicarse ou achegase a menos de 500 metros dos descendentes da vítima por un período de 10 anos. Con respecto á responsabilidade civil, a Fiscalía pide que o proceso indemnice en 30.000 euros ao fillo da falecida.
