InicioSociedadeCentros educativos de Vigo lembran aos falecidos no incendio de Alfonso X...

Centros educativos de Vigo lembran aos falecidos no incendio de Alfonso X e piden protección para os menores

Lembraron este luns aos falecidos no incendio rexistrado na madrugada do pasado 11 de outubro nun edificio da rúa Alfonso X O Sabio da cidade, que se saldou con catro vítimas mortais, tres delas menores, polo que pediron ás administracións públicas que protexan aos máis pequenos.

PUBLICADO O

- Advertisement -

Centros educativos de Vigo lembraron este luns aos falecidos no incendio rexistrado na madrugada do pasado 11 de outubro nun edificio da rúa Alfonso X O Sabio da cidade, que se saldou con catro vítimas mortais, tres delas menores, polo que pediron ás administracións públicas que protexan aos máis pequenos.

Así o fixeron nun acto levado a cabo no IES Álvaro Cunqueiro da urbe olívica. Nel estiveron presentes membros da dirección do CEIP Alfonso D. Rodríguez Castelao, do CEIP Celso Emilio Ferreiro e do IES Álvaro Cunqueiro, centros aos que acudían Sara, Ezequiel e Aldara, os tres menores falecidos.

Eles estiveron arroupados por outros compañeiros do CEIP Escultor Acuña, onde estaban escolarizados outros nenos que se salvaron das chamas, así como do IES Santa Irene ou do IES Alexandre Bóveda, entre outros. Durante a homenaxe, desenvolvida cando se cumpre un mes do tráxico suceso, os membros do claustro leron un manifesto onde mostraron a súa “indignación” polo sucedido, xa que un mes despois “todo segue igual”.

“Fáisenos moi difícil expresar toda esta tristeza que sentimos, pero é necesario facer o esforzo, porque aínda que non foi un incendio provocado e, por tanto, fortuíto, o certo é que as condicións de precariedade foron decisivas para que o desenlace do suceso resultase mortal“, lamentaron. Respecto diso, indicaron que case un 25 % dos nenos galegos está en situación de pobreza ou en risco de exclusión social, mentres que ata un 8,5 % dos menores vive na pobreza severa.

“Para as institucións son números, pero para nós son nenos con nomes e apelidos, que nos miran todos os días aos ollos, que nos interpelan, que aquí atopan unha contorna segura, cálida, acolledora, brazos abertos e sorrisos, pero fóra non teñen unha vivenda digna nin unha contorna segura”, reivindicaron os profesores, visiblemente emocionados durante todo o acto.

PROTECCIÓN PARA TODOS OS NENOS

Por todo isto, solicitaron ás administracións públicas que garantan as necesidades básicas dos máis pequenos, como a súa alimentación, a súa vivenda e os seus coidados, ademais da súa saúde e a súa educación“Nos centros descoñecemos, en moitas ocasións, as súas circunstancias, e noutras atopamos unha barreira cando nos diriximos a Asuntos Sociais, sempre desbordados e sen suficiente marxe de actuación”, engadiron.

“Como colectivo e como sociedade esiximos protección para todos os nenos que vivan situacións que afecten directamente ao seu benestar físico e emocional”, subliñaron, cifrando nuns 93.000 os nenos galegos en situación de pobreza, sen unha lei específica que os protexa. Os profesores negáronse ” a esquecer” a Aldara, a Ezequiel e a Sara, os tres menores falecidos no incendio de Alfonso X. “Non nos resignamos á súa perda, pero tampouco a que a súa morte fose en balde”, apostilaron, explicando que nas aulas continúa habendo nenos en situacións parecidas ás que vivían os falecidos.

“Nos centros garantimos a igualdade, pero fóra, quen o fai? Reclamamos aos poderes públicos que se comprometan e actúen en favor da infancia. É un dereito e tamén unha obrigación como sociedade”, sentencia o comunicado. Todo iso despois de que na madrugada do pasado 11 de outubro catro persoas falecesen nun incendio rexistrado na rúa Alfonso X O Sabio de Vigo, onde ardeu un edificio okupado. O lume iniciouse tras un fallo eléctrico no cadro de luces do inmoble e provocou a morte de tres menores, ademais da súa nai.

ÚLTIMAS

O Concello de Vigo pide explicacións á RFEF sobre os criterios de selección das sedes do Mundial 2030

O Concello de Vigo remitiu unha carta á Real Federación Española de Fútbol (RFEF)...

Emerxencia na AP-9: unha muller hospitalizada tras sufrir un accidente en Trasmañó

Unha muller, de 44 anos e con iniciais C.A.E., resultou ferida de gravidade tras saírse da...

Desconvocada a folga de persoal de ambulancias na área de Vigo

O persoal de ambulancias da 061 da área Vigo decidiu desconvocar a folga indefinida...

Encontro de amizade e cooperación entre Vigo e México

O alcalde de Vigo, Abel Caballero, reuniuse este venres co embaixador de México en...