Fiscalía pide 6 anos de cárcere para un exdirector dunha sucursal do Banco Pastor por estafar á entidade máis de 740.000 euros, utilizando unha trama de pagarés falsos para conseguir liquidez para os socios dunha empresa da que el mesmo fora coadministrador. No banco tamén sentarán os seus dous socios, e o xuízo celebrarase este xoves e este venres na sección quinta da Audiencia Provincial de Pontevedra, con sede en Vigo.
Esta vista, que estaba prevista para o pasado mes de xuño, foi posposta naquel momento debido a varios problemas procesuais, que derivaron nun acordo de todas as partes para solicitar o adiamento. Agora, dous dos acusados enfrontaranse a seis e cinco anos de prisión, respectivamente, por un delito continuado de Falsidade en documento mercantil en concurso ideal cun delito de estafa, mentres que para o terceiro piden que sexa condenado a tres anos e sete meses de cárcere por un delito de estafa en concepto de cooperador necesario.
Segundo o escrito de acusación pública, os tres acusados (unha persoa de orixe francesa, outro de orixe brasileira e un galego) fixéronse coadministradores dunha empresa en 2004. Dos tres, o socio galego traballaba como interventor nunha sucursal do Banco Pastor (na actualidade Banco Santander) en Sanxenxo. Nesa oficina, a empresa contratou unha liña de desconto e unha de crédito e, dous anos despois, o socio galego foi nomeado director dunha das oficinas do banco en Vigo. Desde ese momento, cesou como coadministrador para ter as mans libres e que a súa oficina puidese operar coa empresa dos seus socios sen levantar sospeitas.
Así, os contratos realizados coa sucursal de Sanxenxo foron trasladados á de Vigo e, desde o seu novo posto, o director da oficina autorizou unha serie de operacións de crédito para favorecer á empresa e aos seus socios. Segundo a Fiscalía, este acusado urdiu un plan para dotar á empresa de liquidez, renovando as liñas de crédito cando ían expirar, aplicando aos seus socios beneficios, ou descontando pagarés que non se correspondían con operacións mercantís reais. Deste xeito, xerouse unha “roda de pagarés” que acabou desembocando nun fenómeno de “bola de neve”, de maneira que uns pagarés abonábanse cos descontos obtidos a través doutros.
A situación mantívose ata que o banco comezou a sospeitar. Entón, o acusado e os seus socios idearon outro método para conseguir o diñeiro: usaban datos de clientes do banco sen a súa autorización para abrir liñas de desconto transitorio e librar así máis pagarés. O importe total do diñeiro obtido fraudulentamente ascendeu a 1,4 millóns de euros, e o prexuízo causado ao Banco Pastor foi de 743.588,42 euros.
DELITOS E PENAS
Por estes feitos, o ministerio público considera ao exdirector da sucursal e a outro dos seus socios autores dun delito continuado de falsidade en documento mercantil, en concurso ideal cun delito de estafa. Así mesmo, ao terceiro acusado considérao cooperador necesario nun delito de estafa.
Deste xeito, a Fiscalía pide que o socio galego sexa condenado a 6 anos de prisión e que pague unha multa de 10.800 euros, aplicando a agravante de abuso de confianza. Para o socio de orixe brasileira pide 5 anos de cárcere e 7.200 euros de multa, e para o suposto cooperador necesario pide 3 anos e 7 meses de prisión, multa de 3.000 euros. Así mesmo, reclama que os tres acusados indemnicen solidariamente ao Banco Pastor en 743.580,32 euros.
