Dous homes acusados dun delito contra a saúde pública, pola venda de drogas desde un taller mecánico da cidade de Vigo, aceptaron 4 anos e medio e 5 anos de prisión, respectivamente, nun acordo de conformidade selado este mércores na sección quinta da Audiencia Provincial de Pontevedra, con sede na cidade olívica.
Inicialmente, a Fiscalía pedía para un dos acusados 10 anos e 7 meses de cárcere por un delito de tráfico de drogas e outro de tenencia ilícita de armas, ademais dun millón de euros de multa; mentres que para o outro procesado pedía 7 anos e medio de cárcere, por tráfico de drogas, e a mesma multa. Ademais, este segundo acusado está pendente doutra causa por unha tentativa de homicidio, tras disparar a un axente durante o rexistro do seu domicilio do Porriño con motivo deste procedemento por tráfico de drogas.
Finalmente, tras estimarse a atenuante moi cualificada de drogadicción, Fiscalía e defensa chegaron a un acordo, e os acusados, que están en prisión provisional, aceptaron, 4,5 anos e 5 anos de prisión respectivamente, e multa de 332.000 euros.
INVESTIGACIÓN
Os dous acusados foron detidos en novembro do ano pasado, no marco dunha investigación na que a Policía seguía a pista dun deles, xerente dun taller de coches de Vigo, e que ten diversos antecedentes por tráfico de drogas.
Tras constatar que ambos os acusados distribuían diferentes estupefacientes desde o propio taller, procedeuse aos arrestos e ao rexistro dos domicilios dos dous acusados, así como dos seus vehículos e dun garaxe anexo ao taller.
Neses rexistros, os axentes atoparon máis dun quilo de heroína, case un quilo de cocaína, máis de 20 quilos de resina de cannabis, uns 2,5 quilos de haxix, centos de pílulas de MDMA e éxtases, varias armas, 18 quilos de sustancias de corte, e case 26.000 euros en efectivos.
