O goberno municipal de Vigo fixou este martes “en tres meses” o prazo de aprobación provisional do novo Plan Xeral de Ordenación Municipal, xusto unha semana despois de que o alcalde, Abel Caballero, anunciase que o documento tería o visto e prace “en dous meses”, e xustificou o mantemento do Instrumento de Ordenación Provisional (IOP) “para dar certidume” á situación urbanística da cidade.
Así o manifestou a concelleira de Urbanismo, María José Caride, nunhas declaracións gravadas e remitidas aos medios, nas que sinalou que o goberno local decidiu “co aval dos xurídicos” fixar neses tres meses o prazo de aprobación provisional, de maneira que, nese tempo, tamén seguirá vixente a ordenación provisional.
Caride trasladou estas consideracións tras coñecerse que o secretario municipal, nun informe realizado precisamente a instancias da concelleira, advertía de que se van a dar problemas de “ordenación discordante” a partir de mediados de outubro, xa que se acaba o prazo de suspensión de licenzas.
Nese momento, se se amplía o prazo de aprobación provisional (algo viable legalmente) e mantense o IOP, as licenzas que se outorguen a partir de entón basearanse nunha ordenación urbanística que “non coincidirá, polo xeral, coa inicialmente aprobada (en agosto de 2021) no PXOM en revisión” e “quizáis tampouco coa que provisionalmente se aprobe” en tres meses.
O secretario advirte de que se trata dunha “situación anómala” e que o pleno, “considerando o interese público en xogo e os fins da PXOM en revisión”, debe valorar “a fin de considerar a conveniencia de deixar, ou non, sen efecto o IOP”. En todo caso, tamén apunta que, se non se mantén a ordenación provisional, a situación urbanística se retrotraerá ao plan de 1993 (o anterior en vigor, dado que o de 2008 foi anulado polo Tribunal Supremo), por tanto, tamén se producirá unha “discordancia”. Con todo, o secretario estima no seu informe que a incidencia desa ordenación discordante “pode ter consecuencias máis leves que a discordancia do IOP”.
María José Caride, non entanto, asegurou que manter a vixencia da ordenación provisional permitirá “dar certidume” á situación urbanística de Vigo, e “estabilidade” aos proxectos que se puxeron en marcha ao amparo desa normativa. Así mesmo, incidiu en que “promotores e cidadáns” pedían manter ese IOP. Finalmente, a edila socialista volveu a insistir en que o Concello de Vigo traballou para axilizar a tramitación da novo PXOM, fronte aos “obstáculos” da Xunta.
