Por segundo ano consecutivo a Universidade de Vigo, coa financiación da Deputación de Ourense, convoca Bolsas de Estudo para o estudantado que se matricule en primeiro curso do Grao en Turismo ou PCEO Turismo-Xeografía e Historia (axudas que van desde os 900 aos 1.350 euros). As solicitudes poden presentarse ata o 13 de outubro.

O sector turístico ten un carácter estratéxico para o Campus e a Deputación de Ourense, mantendo a oferta do primeiro grao público en Turismo do SUG. O grao en Turismo presenta un nivel de empregabilidade moi elevado, de feito, a Facultade de Ciencias Empresariais e Turismo de Ourense ten asinados centos de convenios de prácticas coas principais cadeas hoteleiras e axentes públicos e privados do sector.

A Facultade, co Grao en Turismo, responde coa súa oferta académica a unha necesidade crecente e non cuberta do sector turístico, de profesionais cualificados a nivel superior, para dirixir e xestionar empresas e institucións públicas e privadas.

Froito dos máis de 14 anos de docencia e investigación no grao en Turismo de Ourense, o perfil dos graduados está relacionado coa dirección internacional de hoteis (España, Europa ou Centroamérica), a xestión de eventos, compañías aéreas, guía turística, xestión patrimonial ou a intermediación de reservas.