A Consellería de Infraestruturas e Mobilidade, a través de Augas de Galicia, eliminou un punto de vertedura de augas residuais cara ao río Lagares, no municipio de Vigo. Tal e como informaron nun comunicado, os técnicos do Programa de Control de Verteduras, dependente de Augas de Galicia, localizaron este punto de vertedura tras unha alerta comunicada polo Servizo de Emerxencias do 112.
Na inspección observouse a existencia dun caudal que se emitía a través dun tubo de formigón cara ao curso fluvial. Augas de Galicia puxo esta situación en coñecemento do Concello de Vigo para que levase a cabo as medidas oportunas para a emenda da vertedura irregular.
Nunha recente inspección á zona, os técnicos autonómicos constataron a realización das intervencións oportunas e a ausencia de caudal cara ao río Lagares, eliminando así a vertedura irregular ao dominio público hidráulico.
