O sindicato CUT denunciou este martes que o parque de bombeiros municipal de Coruxo (un parque provisional mentres non se constrúen as novas instalacións en Esturáns) volveu a estar pechado pola falta de persoal, algo que xa ocorreu varias veces nos últimos dous anos.

Nun comunicado, a central explicou que este luns, durante 24 horas, o parque de Coruxo, que debe atender á zona sur da cidade, tivo que estar pechado e “a metade da cidade” estivo “protexida por uns poucos bombeiros do parque de Teis”.

Respecto diso, a CUT sinalou que calquera intervención en zonas como Coia, Navia ou Coruxo debe facerse con efectivos de Teis, o que supón “15 minutos máis” para chegar. De feito, así ocorreu con varios lumes rexistrados no sur da cidade na madrugada deste martes: un coche na rúa Pablo Iglesias, e varios colectores nas zonas de Fragoselo, Saiáns e estrada de Camposancos.

“Isto significa que tanto a seguridade dos cidadáns destas zonas como a dos bombeiros que están de garda queda totalmente mermada por falta de persoal e polo aumento dos tempos de resposta”, indicou a CUT. O sindicato denunciou que o ocorrido é resultado de “anos sen ofertas de emprego e inxentes cantidades de horas extras do persoal para soster o servizo“. “Tanto a xefatura de área como a do servizo, así como concelleiros e alcalde ten sobre as súas costas o peso da responsabilidade do que poida pasar”, advertiu.

Por outra banda, fontes do sindicato confirmaron que na xornada deste martes, novamente hai unha dotación mínima de bombeiros para toda a cidade, de 12 efectivos (contando condutores, bombeiros, telefonistas, etc.), cando o propio goberno municipal recoñeceu que prestar o servizo con menos de 20 bombeiros colocaría aos cidadáns nunha situación de “indefensión absoluta”.