A Deputación de Pontevedra investirá máis de 680.000 euros na mellora da seguridade peonil na EP-2106 entre A Ramallosa e Parada, no Concello de Nigrán, para a creación dunha senda ao longo de case un quilómetro desta vía, así como a creación dunha plataforma única nun tramo de 200 metros.

Tal como informou o ente provincial, son oito as empresas que optan a levar a cabo estas obras, tras concluír o prazo de presentación de ofertas. A actuación, cuxo proxecto dispón dun orzamento que rolda o millón de euros, financiarase a través dun convenio mediante o cal a Deputación achegará o 70% do investimento e o Concello, o 30% restante.

Os traballos levaranse a cabo ao longo dun quilómetro desta estrada provincial para buscar facilitar as condicións de seguridade e mobilidade das persoas na zona próxima á Igrexa de Santiago de Parada e na que están situados varios equipamentos públicos.

Por iso, crearase unha senda peonil de 2,5 metros de ancho pola marxe dereita en case todo o ámbito de actuación e unha plataforma única nun tramo de 200 metros de lonxitude, tendo en conta as condicións da contorna, na cal se prevé a instalación de mobiliario urbano e a recolocación da marquesiña de autobús, entre outras actuacións.