O novo centro de saúde de Mos, que será construído pola Xunta de Galicia no antigo hospital de O Rebullón, aumentará un 44% a superficie do actual. Este venres, o conselleiro de Sanidade, Julio García Comesaña, e a alcaldesa de Mos  Nidia Arévalo, visitaron as instalacións actuais para dar a coñecer aos profesionais as características que terá o novo centro.

A súa construción está recollida na fase 2 do Plan de Infraestruturas Sanitarias de Atención Primaria e vén motivada pola necesidade de adaptar as instalacións deste centro, que conta xa con 28 anos de antigüidade e que é necesario dimensionar ao crecemento do municipio.

Por iso, o Goberno galego decidiu inserir este novo centro dentro dun proxecto integral de creación dun complexo sociosanitario no antigo hospital de O Rebullón, onde compartirá espazos con outras dotacións, como un centro público de coidados intermedios, unha nova escola infantil ou unha residencia de maiores.

Este proxecto reserva para o novo centro de saúde máis de 2.300 metros cadrados, un 44% máis que os 1.641 metros actuais. Desta maneira, permitirá crear dúas consultas máis de docencia, para incrementar o número de residentes que se poderán formar alí, así como unha área de pediatría específica, entre outros elementos.