O Xulgado de Instrución número 3 de Tui, en funcións de garda no momento dos feitos, acordou o ingreso en prisión provisional, comunicada e sen fianza para a detida este luns na devandita localidade pontevedresa por supostamente queimar 21 coches de madrugada.
Segundo informaron fontes do Tribunal Superior de Xustiza de Galicia (TSXG), a muller pasou na mañá deste martes a disposición xudicial e está a ser investigada por un presunto delito de danos con risco para as persoas ou, alternativamente, estragos.
Trátase dunha veciña de Tui, de 52 anos de idade, que foi detida grazas ao visionado das cámaras de seguridade. As primeiras informacións apuntaban a que unha disputa familiar podería estar detrás das causas do suceso. Aínda que non se descartan outras hipóteses, polo momento as investigacións suxiren que actuaría soa.
FEITOS
Todo iso despois de que 21 coches acabasen calcinados na madrugada deste luns en Tui. Tal como informaron fontes do Concello e do 112 Galicia consultadas por Europa Press, foi minutos antes das 04,00 horas cando se tivo constancia do primeiro lume. A persoa que chamou aos servizos de emerxencias indicou que había tres vehículos ardendo na Praza da Armada.
Tras apagar os lumes, os axentes comezaron a traballar sobre o terreo para extraer conclusións do ocorrido e na tarde do luns detívose a unha muller como presunta autora dos feitos. Este martes pasou ha disposición xudicial, decretándose o seu ingreso en prisión provisional.
