O próximo sábado, 14 de maio, celebrarase a décimo oitava edición da Andaina Solidaria Tudense, un evento que foi presentado este xoves na casa do concello polo alcalde, Enrique Cabaleiro, o concelleiro de Deportes, Rafael Estévez, e o presidente do club Andatui Rego da Pedra, José Martínez Tato.
Trátase, en palabras do alcalde, dun “referente no noso calendario deportivo para moitas persoas afeccionadas a camiñar que nos visitan cada ano para participar nesta andaina”. Ademais, este ano o evento fai a súa 18 edición, unha oportunidade para “ensinar a riqueza que ten Tui e o Parque Natural do Monte Aloia”, sinalou tamén o presidente do Club AndaTui Rego da Pedra, José Martínez Tato.
Así, está previsto que a andaina comece ás 10 horas do sábado dende a praza da Inmaculada, para realizar un tramo do Camiño Portugués, enlazar coa ruta da Pedra Santa, a Ponte das Febres, os Muíños de Paredes, a capela de San Xián, Frinxo e o Alto dos
Cubos, e regresar logo ao punto de partida. En total serán 23 quilómetros de andaina.
A inscrición está aberta ata o próximo mércores, 11 de maio, ou ben ata completar as 200 prazas establecidas como máximo. As persoas interesadas deben seguir as instrucións que figuran en www.andatui.es e abonar o prezo de 12 euros, no que se inclúe seguro, camiseta conmemorativa, xantar e avitullamentos ao longo do percorrido. Os alimentos recollidos na entrega dos dorsais serán doados a SOS Tomiño Baixo Miño.
