A presidenta da Deputación de Pontevedra, Carmela Silva; o alcalde de Tui, Enrique Cabaleiro; e a directora de Relacións Institucionais e Filatelia de Correos, Leire Díez presentaron este martes o selo da serie filatélica ’12 Meses, 12 Selos’ dedicado á provincia de Pontevedra.

Correos puxo en circulación este selo como “unha homenaxe á provincia e o seu gran valor artístico e monumental”. Con esta emisión, Correos continúa o seu percorrido filatélico polas provincias españolas, tentando que se lles dea unha gran visibilidade a través dos franqueos.

A imaxe deste selo fórmana as súas iniciais “PO” que figuran sobre un fondo que mostra unha imaxe do claustro da Catedral de Tui, que ten a particularidade de ser o máis antigo da comunidade galega. A súa orixe remóntase á primeira metade do século XIII, destacando o seu trazado seguindo a influencia cisterciense.

O selo ten un valor facial de 0,75 euros e permite franquear unha carta normalizada con destino a calquera provincia española.

O selo presentado no Salón de Plenos da Deputación de Pontevedra súmase á relación de selos que Correos dedicou a diversos motivos desta provincia. Este martes tamén se presenta na Guarda o selo emitido en abril dedicado ao Monte Santa Trega. Cun valor de 2,70 euros, o selo recolle un primeiro plano dunha das construcións do castro e de fondo as vistas que se poden admirar desde o monte.

Entre as 28 emisións realizadas, sumando estas dúas, están as que en 1965 rendían homenaxe ao Pazo de Fefiñáns de Cambados, a da ponte de Rande de 1981, ou en 2002 a Denominación de Orixe Rías Baixas ou o cruceiro do Hío