O Arcebispado de Santiago emitiu este mércores un comunicado no que explica que “non se opón” á retirada dos símbolos franquistas na fachada da antiga colexiata de Cangas, aínda que demanda que se “repoña” o “símbolo relixioso” da cruz.
Así respondeu o arcebispado ás palabras do alcalde de Cangas, Xosé Manuel Pazos, que o luns asegurou que a Igrexa fora “reticente” nun primeiro momento a retirar os nomes de caídos do bando franquista e do fundador da Falange, José Antonio Primo de Rivera, desta fachada.
Segundo recolle o comunicado, “nin o párroco nin o arcebispado” do que depende esta colexiata, o de Santiago, “tentaron frear a retirada dos símbolos aludidos”. “Antes ao contrario, actuaron de acordo aos mandatos das leis vixentes e en contacto co Concello de Cangas”, reivindican, lembrando que, “no seu día, foi o poder civil o que colocou os símbolos e as inscricións, sen que as autoridades eclesiásticas promovesen aquelas actuacións”.
No entanto, o arcebispado lamentou que, “a pesar de solicitar ao Concello clarificación dos pasos a dar para retirar os devanditos símbolos”, non se comunicase “previamente aos servizos técnicos de Patrimonio Cultural” os feitos, nin se “avisase ao párroco nin á Curia o comezo da súa retirada, tal e como se acordou previamente por parte dos seus respectivos servizos xurídicos”. “Iso implicaba a presenza do arquitecto do arcebispado, a fin de previr calquera dano ao patrimonio”, precisan.
En todo caso, a Igrexa avanzou que instará o Concello a “a reposición no seu lugar da cruz retirada, xa que é exclusivamente un símbolo relixioso”. “A autorización da Dirección Xeral de Patrimonio era unicamente referente a letras e placa, debendo quedar na propia Igrexa para a súa custodia”, apuntan.
