O alcalde de Vigo, Abel Caballero, volveu a acusar á Xunta de “obstaculizar” a aprobación do Plan Xeral de Ordenación Municipal (PXOM) antes das eleccións locais, que se levarán a cabo o próximo mes de maio.
En rolda de prensa, o rexedor asegurou que o PXOM se aprobará provisionalmente a mediados de ano xa que, segundo el, o goberno local está comprometido coa revisión do documento para que a súa tramitación sexa “áxil e rápida”.
Caballero puxo en valor que o novo PXOM será un plan “libre de especulación” que permitirá 15.000 vivendas de protección, máis zonas verdes, máis dotacións públicas e fomentará unha cidade máis accesible.
Con todo, asegurou que a Xunta está “a obstaculizar” a aprobación provisional do documento, indicando como exemplo que o informe de Patrimonio tardou nove meses en chegar e foi negativo. Na súa opinión, resulta “intolerable” que ese documento fose asinado e estivese “gardado nun caixón 41 días” antes de enviarse.