O Pleno de Vigo aprobou na sesión extraordinaria celebrada este venres a presupostos ‘marca’ de 292 millóns tras a finalización do período de alegacións.
Na súa intervención, o concelleiro da área de Orzamentos e Facenda do Concello de Vigo, Jaime Aneiros, sinalou que “o novo orzamento contribuirá a transformar a cidade“. “É un fito en Galicia e en toda España que unha cidade teña 16 orzamentos consecutivos na súa historia”, engadiu.
O orzamento para 2023 conta con 292 millóns de euros, seis millóns de euros máis que no exercicio anterior, e que ascenderán ata os 385 millóns grazas aos remanentes e as axudas procedentes dos fondos europeos.
O concelleiro da área de Orzamentos e Facenda do Concello de Vigo tamén comentou o cinco liñas mestras dos orzamentos para 2023: a política social, os servizos públicos de calidade, a transformación constante da cidade a través de humanizacións, a dinamización da economía da cidade e a política redistributiva. “Son uns números extraordinarios para unha cidade extraordinaria. Votar a favor destes orzamentos é dicir si a máis e mellor Vigo, votar en contra é frear á cidade e os que o fagan terán que explicalo”, sentenciou.
CRÍTICAS DA OPOSICIÓN
Pola súa banda, o concelleiro e candidato á alcaldía de Vigo do Bloque Nacionalista Galego (BNG), Xabier Pérez Igrexas, sinalou que estes orzamentos confirman “de maneira clara” que volverán ser as contas do “aquí mando eu“. “Primeiro elaboraron os orzamentos sen contar con ninguén máis. Despois dixeron que non a todas as emendas presentadas e, agora, rexeitan con argumentos burocráticos e cunha aplicación ultrarestrictiva da norma todas e cada unha das alegacións veciñais presentadas”, cuestionou.
Nesta mesma liña, o portavoz municipal do Partido Popular (PP), Alfonso Marnotes, declarou que o goberno local “pasa a contar con seis millóns e medio de euros máis, pero esa cantidade non se vai para gasto produtivo senón para afrontar o enorme incremento do gasto corrente”. “As contas de Caballero non teñen como obxectivo manter a actividade económica, nin fomentar o emprego, nin a protección social das persoas que máis o necesitan”, reprobou.
Así mesmo, o portavoz de Marea de Vigo, Rubén Pérez, sinalou que “de que vale ter diñeiro no peto e na capacidade financeira dun Concello se logo a execución é a que é e dise que a capacidade é limitada”. Pérez tamén criticou que “non hai ningún concello gobernado por maioría absoluta onde nin sequera antes de presentar os orzamentos se diga á oposición cales van ser os mecanismos e o goberno local de Vigo confunde de maneira sistemática a maioría absoluta con absolutismo”.
