O venres 4 de maio saíu no Documento Oficial de Galicia (DOG) unha liña de axudas de máis de 4 millóns de euros dirixida aos concellos galegos para a creación ou mellora de infraestruturas e equipamentos nos concellos de Galicia.

Ditas axudas, en réxime de concorrencia non competitiva, adxudicáronse en estrito orde de rexistro ata esgotar o crédito dispoñible. “Pero as devanditas axudas remataron 12 minutos despois de saír a convocatoria para a presentación de solicitudes”, subliña Xosé Luis Jácome, deputado de En Marea.

“É evidente que este sistema de adxudicacións é, canto menos, inxusto, ademais o contexto deste reparto de subvencións dá a pensar”, segundo o deputado Xosé Lois Jácome, “de que canto menos algúns dos concellos que accederon ás axudas eran concellos previamente avisados, xa que as solicitudes tiñan que ir acompañadas de diversa documentación”. Polo tanto, selou: “Haberá que ver se é casualidade a cor política dos municipios que acadaron estas subvencións”.

Aínda así, o deputado provincial advirte que “independentemente da cor política destes concellos, é evidente que este sistema non favorece a igualdade entra a cidadanía da provincia de Pontevedra e de todo o país”, pois “as subvencións non poden ser un reparto que se fai nunha carreira de atletismo, onde o concello que chega primeiro gaña a subvención, máis alá de cal sexa a necesidade real do proxecto”.

Pero engadiu tamén que “se para máis escándalo, resultase confirmado que todos, ou unha gran maioría dos concellos están gobernados polo PP, quedaría confirmado que isto non son máis que subvencións para unha precampaña electoral, usando os cartos de todas para lucimento de concellos do mesmo partido que Feijóo”, apuntaba Xosé Lois Jácome este venres.