O alcalde de Vigo, Abel Caballero, achacou a unha “decisión política” adoptada en “abuso de autoridade” a multa imposta pola Xunta ao Concello por unha infracción no control sobre a concesionaria de abastecemento de auga, Aqualia, durante o período de seca de 2017 tras rexeitar un recurso contra a sentenza que a anulou o Tribunal Superior de Xustiza de Galicia (TSXG).

Así se pronunciou despois de que o alto tribunal galego rexeitase o recurso interposto pola Xunta contra a sentenza que declarou nula a sanción de 10.500 euros que lle impuxo ao Concello ao considerar que non se produciu unha ausencia de control da concesionaria.

Ante esta situación, o rexedor criticou que durante a seca de 2017 o Goberno galego non realizase unha redución do caudal ecolóxico nin un transvase de emerxencia e reprobou que impuxese unha sanción “por decisión política e en abuso de autoridade”. “Non cooperou, tentou que quedásemos sen auga e púxonos unha multa para tentar culpar politicamente ao Concello”, denunciou.

Nesta liña, lamentou o “permanente acoso contra a cidade de Vigo” no que, ao seu xuízo, “está” a Xunta e preguntouse “quen vai asumir a responsabilidade” da “gravísima decisión” que supuxo a imposición da multa ao Concello.