A Xunta de Goberno local do Concello de Vigo aprobou a interposición dun novo recurso contencioso administrativo contra o cofinanciamento de escolas infantís da Xunta de Galicia na cidade, segundo informou en rolda de prensa o alcalde, Abel Caballero.
En concreto, o Concello presentará recurso contra a resolución de aprobación da segunda liquidación de 2018, e das dúas primeiras liquidacións correspondentes ao ano 2019, do Consorcio Galego de Servizos de Igualdade e Benestar (entidade que xestiona as gardarías e centros de día da administración autonómica).
En novembro de 2017 xa recorrera a liquidación de pagos de gardarías, sen que o TSXG pronunciouse ata o momento. No entanto, para “evitar maiores prexuízos”, segundo se recolle no expediente, o Concello acabou pagando esas liquidacións.
O rexedor olívico insistiu no seu argumento de que esas resolucións son “inconstitucionais” e obrigan ao Concello a sufragar, cada ano, 207.000 euros para cofinanciar as escolas infantís de titularidade galega e de competencia da Xunta.
“É intolerable, un novo abuso da Xunta cara a Vigo. Nós xa temos e pagamos as nosas escolas infantís”, sinalou Abel Caballero, en referencia ás gardarías do Concello.
O alcalde de Vigo foi, nos últimos anos, moi belixerante con este sistema de cofinanciamento e, de feito, anunciou varias veces recursos contenciosos contra eses pagos, tamén no caso dos centros de día autonómicos.
Pola súa banda, a Xunta lembrou que eses servizos se xestionan desde o Consorcio Galego de Servizos de Igualdade e Benestar, unha entidade interadministrativa á que o Concello de Vigo está adherido.
A ese respecto, sinalaron desde a administración galega, o modelo de confinanciación destes servizos está vixente de 2017 e é de aplicación en todos os concellos que forman parte do Consorcio, e foi aprobado por unanimidade entre representantes de todos os partidos políticos na Federación Galega de Municipios e Provincias (FEGAMP).
De feito, o goberno vigués xa interpuxo recurso contencioso administrativo polo pago de liquidacións correspondentes aos centros de día de Teis, Coia e Valadares, e o TSXG desestimouno.
