O BNG criticou este xoves o “veto antidemocrático” de PSOE e PP no Concello de Vigo, despois de que estes grupos rexeitasen levar a pleno a proposta do concelleiro nacionalista, Xabier Pérez Igrexas, de designar Vigués Distinguido ao colectivo La Insurgencia.
O edil do BNG lamentou que ‘populares’ e socialistas houbesen “amordazado” os Vigueses Distinguidos deste ano, impedindo que a súa proposta fose levada ao pleno que se celebrará este venres, e no que se votará ás persoas e entidades designadas este ano con ese recoñecemento.
Pérez Igrexas, que lembrou que varios dos membros da Insurxencia son vigueses, defendeu o traballo deste colectivo en favor da liberdade de expresión e criticou o proceso xudicial que condenou a varios deles a penas de prisión e multas polo contido dalgunhas das súas cancións.
“Non sorprende a posición do PP, pero vemos como o PSOE, que prometeu ata a extenuación que derrogaría a Lei Mordaza, agora vólvelle as costas a un grupo de artistas que ven conculcada a súa liberdade de expresión e creación cunha sentenza inxusta”, recalcou o concelleiro.
Ademais, sinalou que é a primeira vez na historia democrática de Vigo “que se veta unha proposta de nomeamento de Vigueses Distinguidos, realizada por unha forza política con representación no Pleno, como é o BNG”.
A ese respecto, lamentou que os Vigueses Distinguidos deixasen de ser un recoñecemento de toda a cidade, para selo “só dunha parte”, e converterse nunha especie de “novo toisón de ouro da orde do Caballerismo”.
