InicioVigo e contornaO PorriñoCiudadanos conmemora o Orgullo nunha Caravana Ciclista no Porriño: "No noso proxecto...

Ciudadanos conmemora o Orgullo nunha Caravana Ciclista no Porriño: “No noso proxecto para Galicia todos teñen cabida”

O partido laranxa avisa dun "tripartito" cun BNG que bebe do "ultranacionalismo catalán" e busca "establecer cidadáns de primeira e de segunda".

PUBLICADO O

- Advertisement -

A candidata de Ciudadanos á Xunta, Beatriz Pino, participou este domingo nunha Caravana Ciclista para conmemorar o Día do Orgullo LGTBI+ no Porriño, onde asegurou que no seu proxecto para Galicia, “de cidadáns libres e iguais, todos teñen cabida”.

Así o manifestou durante este evento ao que asistiu xunto ao seu tío, o exciclista Álvaro Pino, xunto ao gañador do Tour de Francia de 2006, o mosense Óscar Pereira, e xunto a outros membros de Cs, entre eles a portavoz do partido a nivel estatal, Melisa Rodríguez, e o portavoz adxunto no Congreso, Edmundo Bal.

Neste contexto, Beatriz Pino recalcou que o partido laranxa participou, participa e participará “sempre” no Orgullo LGTBI+: “Nunca faltamos á cita nin o faremos este ano, aínda que sexa dunha maneira diferente debido á situación sanitaria que atravesa o país”.

E é que, tal e como garantiu a tamén portavoz da formación en Galicia, Cs levará “a bandeira da liberdade e da igualdade” alá onde vaia, igual que tamén acudirá a “calquera” acto ou manifestación que defenda estes valores.

Por isto mesmo, e aínda que recoñeceu que Galicia avanzou “moito” en materia de dereitos LGTBI+, aseverou que “é moito máis o que queda por facer”. “Temos unha boa lei de 2014 polos dereitos LGTBI+, pero esta lei non pode quedar nun caixón e leva xa demasiado tempo sendo máis un anuncio que unha realidade”, lamentou.

Así, prometeu que “implementará de maneira efectiva” este texto para así “protexer os dereitos do colectivo, especialmente no ámbito rural”, para evitar episodios “de silencio, de discriminación e de acoso escolar”.

BAL AVALA A BEATRIZ PINO

Pola súa banda, o portavoz de Cs no Congreso, Edmundo Bal, quixo acompañar nesta Caravana Ciclista á candidata á Xunta, a quen eloxiou por ser “a persoa idónea” para liderar o proxecto da formación liberal en Galicia. “O 12 de xullo estamos a xogarnos unha Galicia para mellor ou unha Galicia para peor. Unha España para mellor ou unha España para peor”, recalcou.

Bal, de raíces galegas, aproveitou para advertir ante un posible “tripartito” no que participe o BNG, ao que acusou de, tal e como demostrou, dixo, cando gobernou xunto ao PSdeG entre 2005 e 2009, “querer profundar” nas “diferenzas entre os galegos” e “establecer cidadáns de primeira e de segunda”.

Neste sentido, cargou contra o Bloque por ir da man do “ultranacionalismo catalán” e de querer para Galicia un “escenario de inestabilidade” e “de empresarios que cambian as súas sedes de sitio porque non poden soportar esa situación á que lles leva ese nacionalismo fanático”.

“Nós ofrecemos unha Galicia mellor, Bea é a candidata dunha Galicia mellor, unha Galicia moderna, unha Galicia máis conectada e unha Galicia que sexa unha terra de oportunidades e onde os galegos non teñan que abandonar a súa querida terra”, insistiu.

ÚLTIMAS

Rueda, preparado para negociar con Caballero

O desbloqueo da urbanización da ETEA, a reforma das pistas de Balaídos, ou a...

A concelleira de Urbanismo afea a “actitude” da Xunta a catro días da reunión de Rueda e Caballero

O goberno municipal de Vigo afeou este venres "o fondo e as formas" das declaracións da...

O PP de Vigo esixe a Caballero que garanta a seguridade en San Xoán ante a previsión de falta de bombeiros

O grupo municipal do PP no Concello de Vigo esixiu este venres ao alcalde, Abel Caballero,...

Falece un mozo en Vigo tras ter un accidente cunha carretilla elevadora

Un mozo de 24 anos de idade faleceu este xoves en Vigo tras sufrir...