O alcalde de Vigo, Abel Caballero, anunciou este luns que convocará un comité asesor de expertos para afrontar o proceso de ‘desescalada’ e de reactivación da actividade no marco da pandemia por coronavirus.
Así, o rexedor vigués avanzou que ese comité asesor estará formado por unhas 15 persoas, dos ámbitos da Medicina, a Enfermaría, a Ciencia e a Investigación (Universidade de Vigo) e do ámbito da administración (técnicos do Concello). “Quero ter o meu propio consello asesor, que non vai ter rumbo político”, apuntou Caballero.
Nese sentido, o alcalde lembrou que se iniciou “unha etapa distinta” con medidas de alivio do confinamento, como a saída dos nenos, e “enseguida vaise empezar a desescalada”. Ata agora, engadiu, as medidas competían ás autoridades sanitarias pero, de agora en diante, os municipios tamén terán que tomar decisións e é nese ámbito no que o rexedor pretende contar co asesoramento de expertos.
Ese comité servirá para perfilar medidas de ‘desescalada’ como prazos, sectores económicos afectados, ou ritmo do desconfinamento. “Quero ese asesoramento, porque empezo a escoitar cousas que non están suficientemente reflexionadas, cousas que non comparto”, indicou, aínda que eludiu ser máis concreto para “non entrar en debates políticos”.
“Eu teño as miñas propias opinións e quero contrastalas con expertos, porque algunhas das que escoito, e non por parte do Goberno de España, non as comparto“, incidiu.
Por outra banda, e preguntado acerca de posibles medidas a partir do 2 de maio (como a reapertura de parques ou zonas verdes), cando estea permitida a saída para facer deporte de forma individual ou paseos en familia, Abel Caballero chamou á “cautela” e avogou por evitar accións que supoñan “un efecto chamada”.
O rexedor lembrou que “a etapa máis complexa na rúa vai ser a ‘desescalada'” e pediu aos veciños que sigan extremando as precaucións porque “o peor que pode pasar é ter que dar marcha atrás”. “Temos que ir dando pasos sen que haxa unha repunta (na epidemia). Non nos confiemos, o virus non se foi, segue aquí”, recalcou.
