O presidente da Xunta de Galicia, Alberto Núñez Feijóo, valorou este xoves que a sentenza que declara contraria a dereito a esixencia de estar empadroado en Vigo para ter o cartón que bonifica os billetes de bus urbano (PassVigo) veu a “restablecer a igualdade de todos os cidadáns para utilizar os servizos públicos”.
Tras participar nun acto de Sanidade en Vigo, o presidente galego sinalou que esa resolución, do xulgado do Contencioso Administrativo número 1 de Vigo, supón que hai que “cumprir a lei”, en alusión ao feito de que o xuíz basea a súa decisión na vulneración, por parte do Concello olívico, de varias normas que garanten a non discriminación dos usuarios de transporte público nin por razóns de residencia, nin sociais, nin doutra índole.
Segundo Núñez Feijóo, todos os concellos en Galicia acatan a legalidade, e non houbo problemas na Coruña, Ferrol ou Santiago. “Todos cumpren, agás un”, sinalou, en alusión a Vigo, e engadiu que “agora a Xustiza lembrou a ese un que a lei é igual para todos”.
“Os xuíces restableceron a igualdade de todos os cidadáns para utilizar os servizos públicos independentemente de onde vivan (…), veñen lembrar que todos somos iguais e non pode haber distinción por un lugar ou por un político, por moi importante que sexa ese político”, proclamou o presidente da Xunta.
A sentenza que declara ilegal esa condición do empadroamento para obter o cartón PassVigo supón estimar un recurso presentado polo Concello de Redondela, limítrofe coa cidade olívica, e cuxos veciños (do mesmo xeito que os doutros municipios) puideran usar o cartón que bonificaba os seus billetes ata abril de 2018.
O alcalde, Abel Caballero, atribuíu a decisión do xulgado a unha lei galega, a 2/2017, unha “lei antiVigo” deseñada expresamente por Feijóo, denunciou, para “atacar” á cidade olívica e para obrigar aos vigueses “a pagar parte do billete de bus dos que veñen de fóra”.
