O alcalde de Vigo, Abel Caballero, acusou este xoves a Xunta de “mentir” e “enganar” á Asociación de Familiares de Enfermos de Alzheimer (Afaga), aos que ofreceu a cesión dun local que, en realidade, é de titularidade municipal.

Así o trasladou o rexedor en referencia ao anuncio feito polo vicepresidente do goberno galego, Alfonso Rueda e pola delegada da Xunta, Corina Porro. Tras reunirse cos responsables de Afaga, Rueda e Porro anunciaron que os locais de Rivera Atienza que actualmente ocupa a Policía Autonómica serán cedidos a esta entidade, cando a unidade policial trasládese á súa nova localización, na futura Cidade da Xustiza.

“Dixéronlle a Afaga que cando a Policía Autonómica se cambie cederíanlle o actual local… Mágoa que ese edificio é municipal, non é autonómico”, proclamou Abel Caballero.

O alcalde lembrou que esas instalacións son propiedade municipal e que, en virtude dun convenio asinado a finais dos 90, cedéronse á Policía Autonómica. En canto a Policía as abandone, incidiu, estas reverterán de inmediato ao Concello.

De feito, puntualizou Caballero, o local xa tiña que retornar ao Concello “hai 10 anos”. “E estámoslles permitindo que estean gratuitamente”, engadiu o rexedor olívico, que atribuíu a oferta do goberno galego á súa “campaña electoral permanente”.

“A súa ansia electoral é tal que ofrecen edificios que non son deles. Isto é un engano, están a mentir a Afaga por razóns electorais (…), son as montaxes da Xunta enganando á xente”, sentenciou o alcalde de Vigo.

RESPOSTA DA XUNTA

A Xunta  reiterou este xoves a súa oferta de ceder a Afaga o local que actualmente ocupa a Policía Autonómica en Rivera Atienza.

O Goberno galego saíu así ao paso das declaracións do alcalde, lamentou que este “pretenda deixar sen local” a esta asociación e lembrou que as instalacións de Rivera Atienza son a sede da Policía Autonómica desde hai máis de 20 anos. Así mesmo, segundo consta nos “informes” de que dispón o Goberno galego, este local pode destinarse “a outro uso dentro do ámbito competencial autonómico”, como pode ser a cesión a fundacións e asociacións.

Por todo iso, quixo reafirmar o seu “compromiso co tecido asociativo de Vigo” e a súa decisión de ceder o local a Afaga, aínda que o alcalde “pretenda torpedear unha nova iniciativa da Xunta” na cidade olívica, neste caso, “á conta de deixar sen sede” esta entidade sen ánimo de lucro.